Harry Kane shpëton Anglinë, “Tre Luanët” përmbysin Kongon dhe sigurojnë kalimin tutje në Botëror
Anglia ka shmangur një surprizë të madhe në Kupën e Botës, duke përmbysur Kongon me rezultat 2-1 dhe duke siguruar kualifikimin në fazën e 1/8 së finales pas një ndeshjeje dramatike të zhvilluar të mërkurën.
Heroi i sfidës ishte kapiteni Harry Kane, i cili realizoi dy gola në pjesën e dytë dhe i dha “Tre Luanëve” një fitore të vuajtur, por shumë të rëndësishme.
Kongo tronditi anglezët që në minutën e shtatë, kur Brian Cipenga përfitoi nga një aksion në zonë dhe mposhti portierin Jordan Pickford, duke i dhënë skuadrës afrikane një epërsi të papritur.
Për pjesën më të madhe të ndeshjes, Anglia hasi vështirësi për të gjetur rrugën drejt golit, ndërsa portieri i Kongos, Lionel Mpasi, ishte në formë të jashtëzakonshme, duke ndalur disa raste të pastra të Jude Bellingham dhe sulmit anglez.
Megjithatë, në minutën e 75-të erdhi momenti i shumëpritur. Pas një krosimi nga Anthony Gordon, Kane realizoi me kokë për të barazuar rezultatin në 1-1.
Kur gjithçka po shkonte drejt vazhdimeve, kapiteni anglez mori përsëri përgjegjësinë. Në minutën e 86-të ai goditi saktë drejt këndit të sipërm të portës, duke vulosur përmbysjen dhe kualifikimin e Anglisë.
Pas ndeshjes, Kane u shpreh i lumtur për karakterin e treguar nga skuadra:
“Ishte çështje këmbënguljeje, të vazhdonim të besonim dhe momenti ynë do të vinte. Folëm për momente heroike dhe sot ishte dita ime”
Me dy golat e realizuar, Kane e çoi në pesë numrin e golave në këtë Botëror dhe e forcoi edhe më shumë rekordin e tij si golashënuesi më i mirë i Anglisë në historinë e Kupave të Botës me 13 gola, ndërsa në total ka arritur në 84 gola me kombëtaren.
Anglia tani do të përballet me Meksikën në fazën e 1/8 së finales, në një duel që do të zhvillohet të dielën në Mexico City.
