Valverde “vjedh” fitoren në sekondat e fundit, Real Madrid i bën presion Barcelonës
Real Madridi ka arritur të marrë një fitore dramatike 2:1 si mysafir ndaj Celta Vigos, në kuadër të xhiros së 27-të të kampionatit spanjoll. Heroi i mbrëmjes ishte kapiteni Federico Valverde, i cili realizoi golin e triumfit në minutën e katërt të kohës shtesë.
Takimi nisi mjaft mirë për “Mbretërit”. Ishte mesfushori francez, Aurelien Tchouameni, ai i cili zhbllokoi rezultatin që në minutën e 11-të me një goditje të saktë. Megjithatë, vendasit reaguan shpejt dhe në minutën e 25-të, Borja Iglesias barazoi shifrat, duke ndezur atmosferën në stadium.
Pjesa e dytë ishte e luftuar, me të dyja skuadrat që kërkonin golin e fitores. Celta Vigo ishte shumë pranë përmbysjes së madhe, kur veterani Iago Aspas goditi shtyllën në minutat e fundit, duke lënë të shtirur tifozët vendas.
Atëherë kur u mendua se ndeshja do të mbyllej në barazim, një top i humbur nga lojtarët e Celtas në mesfushë u shndërrua në një mundësi të artë. Federico Valverde mori topin dhe lëshoi një gjuajtje të fuqishme, e cila pas një devijimi përfundoi në rrjetën kundërshtare në minutën e 90+4′.
Me këtë fitore, Real Madridi ngjitet në kuotën e 63 pikëve, duke u afruar në vetëm një pikë larg Barcelonës kryesuese. Presioni tashmë kalon te katalunasit, të cilët do të luajnë të shtunën në një transfertë të vështirë kundër Athletic Bilbaos.
