Matteo Ruggeri kalon te Atletico Madrid – zbulon pse e quajnë “Tigre”

Atletico Madrid ka zyrtarizuar transferimin e mbrojtësit të ri italian, Matteo Ruggeri, nga Atalanta. Pas disa javësh negociatash, marrëveshja u mbyll në fillim të korrikut për një shumë prej 17 milionë euro.

Ruggeri, 21-vjeçar dhe pjesë e përfaqësueses italiane, u shpreh i emocionuar pas kalimit te klubi spanjoll:

“Është një nder i madh për mua të bashkohem me këtë familje. Është një ëndërr e bërë realitet. Jam i emocionuar që i jam bashkuar një klubi kaq të madh, me histori të jashtëzakonshme. Mezi pres të filloj stërvitjet dhe të jap kontributin tim në fushë.”

Ruggeri tha se nuk kishte asnjë hezitim kur mori lajmin për interesimin e Atleticos:

“Kur agjentët e mi më treguan për interesin, nuk pata asnjë dyshim. Thashë menjëherë ‘po’. Ishte një mundësi që nuk mund ta lija të ikte.”

Mbrojtësi i majtë, i njohur për shpirtin luftarak dhe shpërthimet në krah, zbuloi edhe domethënien e nofkës së tij:

“Shpesh kam luajtur si anësor në një mbrojtje me pesë lojtarë, por mund të përshtatem edhe në skema me katër ose si qendërmbrojtës i majtë. Më pëlqen të sulmoj dhe të luftoj për çdo top. Prandaj më thërrasin ‘Tigre’. Nuk tërhiqem kurrë – gjithmonë jap gjithçka për ekipin.”

Një tjetër faktor vendimtar në transferimin e Ruggerit ishte edhe trajneri Diego Simeone. Lojtari italian foli me admirim për të:

“Të punosh me Cholon është një tjetër ëndërr e realizuar. Ai është një trajner i madh dhe një person i veçantë. Fola me të disa ditë më parë dhe menjëherë ndjeva pasionin e tij.”