Conte zbulon momentin që ndryshoi gjithçka te Chelsea: U ndjeva i turpëruar nga paraqitja ndaj Arsenalit
Antonio Conte ka zbuluar prapaskenat e sezonit historik 2016/17, kur e udhëhoqi Chelsean drejt titullit të kampionit në Premier League, duke treguar se një humbje e rëndë ndaj Arsenalit ishte momenti vendimtar për ndryshimin e skuadrës.
Në një intervistë për podkastin italian “Cronache di Spogliatoio”, trajneri italian ka kujtuar periudhën e tij në Stamford Bridge, nga viti 2016 deri më 2018, gjatë së cilës fitoi Premier League dhe Kupën FA.
Conte ka treguar se fillimisht kishte provuar të luante me skemën 4-2-3-1, por që nga ndeshjet e para kishte vërejtur se diçka nuk po funksiononte siç dëshironte.
Barazimi 2:2 ndaj Swansea Cityt dhe humbja 1:2 në shtëpi nga Liverpooli ishin paralajmërimet e para. Megjithatë, goditja më e madhe erdhi në përballjen me Arsenalin, kur Chelsea shkoi në pushim me tri gola disavantazh.
“Ka qenë një nga ndeshjet e pakta në të cilat jam ndier i turpëruar nga paraqitja e ekipit tim”, kujtoi Conte.
Pas kësaj ndeshjeje, italiani vendosi të ndryshonte sistemin e lojës, duke kaluar në skemën 3-4-3.
Ndryshimi nisi të jepte rezultate që në ndeshjen ndaj Hull Cityt. Cesar Azpilicueta u vendos në treshen e mbrojtjes, ndërsa Victor Moses, për të cilin klubi më parë kishte menduar të gjente një zgjidhje tjetër, mori një rol të rëndësishëm në krahun e djathtë.
Rezultati ishte mbresëlënës. Chelsea regjistroi 13 fitore radhazi dhe u shndërrua në skuadrën që Conte kishte dëshiruar që nga fillimi i sezonit.
Trajneri italian ka treguar se objektivi fillestar nuk ishte domosdoshmërisht titulli, por një vend në dhjetëshen e parë të kampionatit. Në fund, skuadra londineze e përfundoi sezonin në vendin e parë, me 93 pikë.
Kanté, një prej lojtarëve më të mirë që ka stërvitur
Gjatë intervistës, Conte ka folur edhe për N’Golo Kanté, të cilin e kishte kërkuar me ngulm pas sezonit të jashtëzakonshëm me Leicester Cityn.
Italiani e vlerësonte energjinë dhe aftësinë e mesfushorit francez për të mbuluar hapësira të mëdha në fushë, duke krijuar përshtypjen se skuadra kishte një lojtar më shumë.
Megjithatë, takimi i parë me Kantén e kishte befasuar. Pas agjentit të tij u shfaq një futbollist që dukej më i vogël fizikisht nga sa e kishte imagjinuar trajneri.
Conte fillimisht kishte pasur dyshime nëse francezi do të përballonte fizikalitetin e Premier League, por ato u zhdukën shumë shpejt.
Sot, ai e konsideron Kantén ndër lojtarët më të mirë që ka pasur nën drejtimin e tij, duke vlerësuar edhe karakterin dhe cilësitë njerëzore të mesfushorit.
Conte vlerëson edhe Cesc Fàbregasin
Në fund, trajneri italian është ndalur edhe te Cesc Fàbregas, ish-mesfushori i Chelseat, i cili tashmë ka nisur karrierën si trajner dhe e ka udhëhequr Comon drejt Ligës së Kampionëve.
Conte ka thënë se ky zhvillim nuk e befason, pasi spanjolli kishte treguar gjithmonë interesim të madh për aspektin taktik të futbollit.
Sipas tij, Fàbregas ishte një lojtar që dëshironte vazhdimisht të mësonte, të kuptonte lojën dhe të parashikonte zhvillimet në fushë përpara se topi të mbërrinte tek ai.
