Agim Ademi, ura lidhëse e futbollit të Kosovës me FIFA-n ndër dekada

Një rrugëtim që nisi në kohërat më të vështira të izolimit dhe vazhdon sot me integrim të plotë e miqësi të nivelit të lartë me shtëpinë e futbollit botëror. Presidenti i Federatës së Futbollit të Kosovës, Agim Ademi po dëshmohet si një figurë kyçe në ndërtimin e raporteve ndërkombëtare për futbollin tonë.

Në një kohë kur futbolli i Kosovës mbijetonte në kushte okupimi, Agim Ademi ishte njeriu i parë nga komuniteti ynë i futbollit që arriti të takonte ish-presidentin e FIFA-s, Sepp Blatter, në vitin 1994. Ky takim shënoi një gurthemel në përpjekjet e Kosovës për t’u dëgjuar në zyrat e Cyrihut, duke treguar vizionin e hershëm të Ademit për të ardhmen evropiane të Kosovës.

Sot, këto raporte janë më të forta se kurrë. Kosova tashmë është bërë një shtet që ka respekt kudo, teksa Ademi vazhdon të mbajë raporte tejet të mira e miqësore me presidentin aktual të FIFA-s, Gianni Infantino. Në çdo event të FIFA-s, Ademi gjithmonë është afër numrit një të futbollit botëror, teksa i njëjti shpërndan edhe postimet e Ademit në instagramin e tij nga eventet e tilla. Kjo dëshmon jo vetëm një bashkëpunim zyrtar, por një miqësi të sinqertë që i shërben interesave të futbollit kosovar.

Vazhdimësia e raporteve me krerët e futbollit botëror tregon për rolin diplomatik të Ademit, duke e mbajtur Kosovën në hartën e prioritetetve të FIFA-s përmes investimeve, projekteve dhe përkrahjes së vazhdueshme.