Argentina përmbys Egjiptin me rikthim spektakolar, siguron çerekfinalen

Argjentina realizoi një nga përmbysjet më dramatike të Kupës së Botës 2026, duke mposhtur Egjiptin me rezultat 3:2 në ndeshjen e 1/8 së finales, të zhvilluar në Atlanta.

Egjiptianët befasuan favoritët duke kaluar në epërsi në minutën e 15-të, kur Yasser Ibrahim shënoi me kokë. Portieri Mostafa Shoubir ishte në formë të jashtëzakonshme, duke pritur edhe një penallti të Lionel Messit, si dhe duke ndalur disa raste të rrezikshme të Alexis Mac Allister dhe Julian Alvarez.

Në minutën e 67-të, Mostafa Zizo dyfishoi epërsinë e Egjiptit pas një kundërsulmi të shpejtë të nisur nga Mohamed Salah dhe Haissem Hassan, duke e afruar skuadrën afrikane pranë një sensacioni të madh.

Megjithatë, kampionët e botës reaguan fuqishëm në minutat e fundit. Christian Romero ngushtoi shifrat në minutën e 79-të, ndërsa vetëm pesë minuta më vonë Lionel Messi barazoi rezultatin me një përfundim të shkëlqyer.

Kur gjithçka po shkonte drejt vazhdimeve, Enzo Fernandez shënoi golin e fitores në minutën e dytë shtesë (90+2), duke vulosur triumfin 3:2 të Argjentinës.

Me këtë fitore dramatike, Argjentina siguron kualifikimin në çerekfinale, ku do të përballet me fituesin e duelit mes Zvicrës dhe Kolumbisë.