Adnan Goluboviq hero në Skenderaj, Ballkani fiton ndaj Drenicës me dramë

Ballkani ka marrë një fitore të madhe në transfertë ndaj Drenicës, me rezultat 2:1, në kuadër të xhiros së 31-të të Superligës së Kosovës.

Skuadra nga Suhareka e nisi më mirë takimin dhe kaloi në epërsi në minutën e 36-të me një supergol nga goditja e lirë i Toni Domgjoni. Epërsia u thellua në pjesën e dytë, kur Festim Alidema realizoi për 2:0 pas një asistimi të saktë nga Almir Kryeziu.

Megjithatë, vendasit nuk u dorëzuan. Igball Jashari shënoi për 2:1 në minutën e 79-të dhe riktheu shpresat për Drenicën. Drama kulmoi në kohën shtesë, kur vendasit fituan penallti pas ndërhyrjes në zonë ndaj Igball Jasharit, e konfirmuar nga VAR-i.

Nga pika e bardhë provoi Ronaldo Chacón, por portieri Adnan Goluboviq doli në skenë duke e pritur goditjen në minutën e 94-të dhe duke i siguruar fitoren ekipit të tij.

Pas kësaj fitoreje, Ballkani vazhdon ndjekjen e kreut me 55 pikë, ndërsa Drenica mbetet në mesin e tabelës.