Year: 2026

Presidenti i FIFA-s, Gianni Infantino ka uruar Federatën e Futbollit të Kosovës me rastin e 10-vjetorit të anëtarësimit në shtëpinë e futbollit botëror. Në një postim të publikuar në profilin e tij në Instagram, Infantino vlerësoi progresin e futbollit kosovar gjatë dekadës së fundit, duke theksuar rritjen dhe ndikimin pozitiv që futbolli ka pasur te gjeneratat e reja dhe tifozët në vend. “Përgëzime Federatës së Futbollit të Kosovës për kremtimin e 10 viteve si federatë anëtare e FIFA-s. Gjatë dekadës së kaluar, futbolli në Kosovë ka vazhduar të rritet dhe të frymëzojë shumë lojtarë të rinj dhe tifozë”, ka shkruar Infantino. Ai po ashtu theksoi përkushtimin e vazhdueshëm të FIFA-s për zhvillimin e futbollit në Kosovë, duke kujtuar kontributin e ish-presidentit të FFK-së, Fadil Vokrri si dhe punën e presidentit aktual, Agim Ademi. “FIFA mbetet e përkushtuar në mbështetjen e zhvillimit të lojës në Kosovë, i cili fillimisht u mbikëqyr nën udhëheqjen e Fadil Vokrrit dhe vazhdon edhe sot nga Agim Ademi dhe ekipi i tij”, thuhet më tej në mesazhin e presidentit të FIFA-s. Kosova u pranua zyrtarisht në FIFA më 13 maj 2016, duke shënuar një nga momentet më historike për sportin kosovar.

Shoqata e Trajnerëve të Futbollit, në bashkëpunim me Federatën e Futbollit të Kosovës organizoi sot në Prishtinë seminarin njëditor me trajnerin gjerman, Rainer Kraft, ku në fokus ishte identifikimi dhe zhvillimi i talenteve të rinj në futboll. Në këtë seminar morën pjesë trajnerë vendorë të grupmoshave deri në U19, si dhe kandidatët e kursit aktual të licencimit të trajnerëve. Gjatë ligjëratës, Kraft prezantoi metodologjinë e punës në kuadër të projektit TDS, duke ndarë përvojat dhe praktikat më të mira për zhvillimin e futbollistëve të rinj dhe krijimin e një perspektive të qëndrueshme për të ardhmen e futbollit kosovar. “Ky seminar kishte të bënte me mënyrën se si përpiqemi të identifikojmë talentet dhe si i stërvitim ato brenda projektit TDS. Prezantuam gjithashtu punën time si trajner i talenteve së bashku me kolegët e mi dhe mënyrën se si mundohemi të zhvillojmë lojtarët e rinj, për t’u siguruar atyre një të ardhme të ndritur në kuadër të Federatës së Futbollit të Kosovës”, deklaroi Kraft. Pjesëmarrësit e seminarit vlerësuan lart organizimin dhe përmbajtjen profesionale të ligjëratës, duke theksuar rëndësinë e shkëmbimit të përvojave me ekspertë ndërkombëtarë. Trajneri i FC Ballkani U17, Zgjuart Kuçi, tha se seminare të tilla janë shumë të dobishme për trajnerët vendorë. “Për neve trajnerët vendorë janë shumë të mirëseardhura ligjëratat nga trajnerë ndërkombëtarë. Shpresoj që këshillat dhe përvojat e tij të na hyjnë në punë në të ardhmen”, u shpreh Kuçi. Ky seminar është pjesë e angazhimit të vazhdueshëm të Shoqatës së Trajnerëve të Futbollit dhe FFK-së për ngritjen profesionale të trajnerëve vendorë dhe avancimin e zhvillimit të talenteve të rinj në futbollin kosovar. Screenshot Screenshot Screenshot Screenshot Screenshot

Skuadra e KFF Dukagjinit nga Klina ka triumfuar për të dytin vit radhazi në Kupën e Kosovës në konkurrencën e femrave. Ashtu si edicionin e kaluar ndaj Mitrovicës, edhe këtë herë futbollistet klinase iu gëzuan trofeut pas ekzekutimit të penalltive, duke e mposhtur kësaj radhe KFV Prishtinën, me rezultat 5:4, pasi ndeshja në kohën e rregullt dhe pas vazhdimeve përfundoi baras 1:1. Finalja e zhvilluar solli rivalitet të madh, emocione dhe luftë sportive deri në sekondat e fundit. Dukagjini kaloi në epërsi qysh në minutën e 4-t me golin e Olsa Kuçit, duke krijuar epërsi të hershme në finale. Megjithatë, prishtinaset nuk u dorëzuan dhe arritën ta rikthejë baraspeshën në minutën e 86-të, kur realizoi Rreze Gashi, duke e çuar sfidën në vazhdime. Edhe gjatë 30 minutave shtesë të dy skuadrat krijuan raste të mira shënimi, madje duke goditur edhe shtyllat, por pa arritur ta gjejnë golin e fitores. Në fund, fituesi u përcaktua nga penalltitë, ku më të sakta u treguan futbollistet e Dukagjinit, të cilat triumfuan me rezultat 5:4, falë pritjes së portieres Lavdije Behrami në serinë e fundit të penalltive dhe ngritën trofeun për të dytin vit radhazi. Pas përfundimit të ndeshjes, trofeun për kapitenen e Dukagjinit, Xhenifer Pjetri, e ndau presidenti i FFK-së, Agim Ademi. Medaljet për ekipet finaliste u ndanë nga anëtarja e Komitetit Ekzekutiv të FFK-së, Vjollca Krasniqi, si dhe nga shefja e futbollit të femrave në FFK, Valbona Gashi Uka.

FIFA.com –  Kosova sot feston 10-vjetorin e saj si federatë anëtare e FIFA-s. Së bashku me Gjibraltarin, Kosova mbetet një nga...

Kombëtarja e Kosovës do t’i zhvillojë dy ndeshje miqësore gjatë muajit qershor, në kuadër të përgatitjeve për edicionin e ri...

Federata e Futbollit e Kosovës, në bashkëpunim me sponsorin zyrtar të Superligës, Albi Mall, vazhdon ndarjen e çmimit tradicional “Ylli i Javës”, i cili i dedikohet futbollistit më të dalluar të javës në Superligën e futbollit kosovar. Për javën e 33-të të këtij edicioni, ky çmim i është ndarë portierit të FC Drenica, Kenan Haxhihamza, i cili ishte vendimtar me pritjet e tij në fitoren shumë të rëndësishme të skuadrës kuqezi kundër SC Gjilanit, me rezultat 2:1. Vlerësimi është bërë nga Komisioni i Veteranëve të Futbollit. Pasi mori këtë çmim, Haxhihamza u shpreh i lumtur që u vlerësua si lojtari më i mirë i javës: “E kemi përgatitur ndeshjen shumë mirë, sidomos duke e ditur rëndësinë e saj dhe pozicionimin tonë në tabelë, duke qenë të vetëdijshëm që pikët e plota duhet të mbesin në Drenicë. Kundërshtari nuk ka qenë i lehtë, sepse në radhët e SC Gjilanit ka individë të cilët mund ta vendosin ndeshjen, megjithatë e kemi analizuar mirë për të arritur te ky rezultat. Për rezultatet e FC Drenica duhet falënderuar stafin e trajnerëve për punën e jashtëzakonshme që nga ardhja e tyre, pastaj ekipin, por në veçanti kapitenët, të cilët me eksperiencën e tyre kanë arritur të krijojnë një atmosferë të mrekullueshme në zhveshtore, e cila reflektohet edhe në fushë, ku gjithmonë shfaqemi si një ekip i bashkuar. Pritjet e mia në këtë ndeshje kanë ndihmuar ekipin dhe për këtë jam shumë i lumtur, si në aspektin individual, po ashtu edhe në atë kolektiv. Meqë tashmë është shpallur matematikisht kampion FC Drita, i uroj për punën e bërë dhe për titullin e merituar, duke i dëshiruar suksese në garat evropiane“, tha ai për faqen zyrtare të FFK-së.

Llapi ka lëshuar pikë të rëndësishme në garën për mbijetesë, pasi ka barazuar pa gola ndaj Dukagjinit, në kuadër të...

Kombëtarja e Kosovës U16 për vajza ka vazhduar me paraqitje të mirë në turneun zhvillimor të UEFA-s që po mbahet...