Paqe në derbin mes Liverpoolit dhe Man.Cityt, Arsenali buzëqesh

Liverpool dhe Manchester City luajtën për herë të dytë këtë sezon pa fitues në Premierligë dhe sërish me nga një gol të shënuar (1-1). Rivalët kryesorë dhe pretendentët për titull ndanë pikët në Anfield Road, teksa ky barazim u festua në Londër, pasi Arsenali është kthyer tashmë në krye të tabelës pas njëzet e tetë ndeshjeve të zhvilluara në këtë sezon.

“Qytetarët” e nisën me energji derbin dhe dërguan kërcënimin e parë vetëm pas dy minutash lojë. Pas një pushimi prej dy javësh, Alvarez u gjend sërish në formacionin startues të kampionit dhe menjëherë u gjend në një rast shënimi, por gjuajtja e tij ishte një detyrë e lehtë për Kelleher, i cili, për shkak të dëmtimit të Alison , qëndroi sërish në mes të dy shtyllave.

Menjëherë pas kësaj shansin e tij e pati edhe Kevin De Bruyne , i cili i pari e vuri në telashe Edersonin, por as ai nuk e goditi objektivin. Futbolli i hapur vazhdoi edhe pas serisë së rasteve në fillim dhe në minutën e 19-të njëra nga rrjetat u drodhë për herë të parë, por goli i Diazit u anulua për shkak të një ofsajdi të mëparshëm të Nunez.

Mirëpo, katër minuta më vonë në tribunën e Anfield ra heshtja dhe gëzim i madh për “Qytetarët”. City fitoi një goditje nga këndi nga krahu i djathtë, Kevin De Bruyne dërgoi topin te Stones, i cili mposhti Kelleher nga afërsia për t’i dhënë kampionëve epërsinë 0-1. 

Në fund të pjesës së parë, të dyja skuadrat patën disa raste për të shënuar. Haaland kërcënoi Liverpoolin, ndërsa në krahun e kundërt Diaz humbi rastin më të madh.

Emocionuese ishte edhe në fillimin e pjesës së dytë, pas gabimit të Akes, portieri Ederson realizoi një penallti të shpejtë për Nunez. Në mungesë të yllit të parë të skuadrës, Mohamed Salah , i cili ishte në stolin rezervë, McAllister mori përgjegjësinë dhe realizoi nga pika e bardhë për 1-1.

Kampioni mundi të përgjigjet me shpejtësi, pasi Phil Foden ishte në një super-shans, por portieri vendas ishte i vendosur mirë dhe rezultati mbeti i pandryshuar. Pas gjysmë ore lojë, Klopp prezantoi armën e tij më të fortë, ku Salah dhe Robertson hynë në lojë dhe Liverpool shkoi në një ofensivë të re. Një prej futbollistëve më optimistë në fushë, Diaz e gjeti edhe një herë veten në një shans të madh shënimi, por sërish nuk arriti ta konvertoj në gol. Në fund të fundit u trondit edhe shtylla e mikpritësit, pasi Doku gjuajti nga një pozicion i vështirë, kështu që në fund të dyja skuadrat u mjaftuan vetëm me një pikë të fituar, nga e cila përfitoi më së shumti Arsenali. Në vendin e dytë renditet Liverpooli me të njëjtin numër pikësh si “topçinjtë” (64), derisa City ka një pikë më pak.