Matthäus kritikon merkaton e Bayernit: S’ka zëvendësues për Kane – Luis Díaz ishte zgjedhja e katërt
Lothar Matthäus, një nga ikonat e Bayern Munichut, ka shprehur hapur pakënaqësinë e tij për merkaton e zhvilluar deri më tani nga klubi bavarez. Në një intervistë për SportBild, ai vlerësoi transferimin e Luis Díaz, por theksoi se nuk ishte objektivi kryesor i klubit.
“Luis Díaz është 28 vjeç, një lojtar që Liverpool-i donte ta shiste sepse nuk po rinovonte kontratën. Shpenzimi prej 75 milionë eurosh për të nuk është diçka e jashtëzakonshme”, u shpreh Matthäus.
“Kolumbiani ka shpejtësi dhe cilësi, kështu që do të jetë i dobishëm dhe mund të zëvendësojë Leroy Sané. Por, nëse klubi do të ishte i sinqertë me veten, do të pranonte se ai nuk ishte zgjedhja e parë. Pas Nico Williams, Rafael Leao dhe Jamie Gittens, Luis Díaz ishte vetëm në vendin e katërt në listën e objektivave”, shtoi ai.
Legjenda gjermane shprehu edhe shqetësimin e tij për mungesën e një alternative për sulmuesin kryesor:
“Unë nuk shoh asnjë zëvendësues të vërtetë për Harry Kane. Ky është një rrezik i madh për sezonin”.
Sa i përket garës për titullin në Bundesliga, Matthäus mendon se vetëm Borussia Dortmund mund të konsiderohet një rivale serioze, por edhe ajo nuk paraqet kërcënim real nëse Bayerni ruan stabilitetin:
“Vetëm Borussia Dortmundi është një rivale e besueshme. Por nëse Bayerni nuk ia komplikon vetes jetën me probleme të brendshme, edhe BVB nuk do të jetë një kërcënim i madh. Vlerësimi i sezonit do të varet kryesisht nga performanca në Champions League”, tha Matthäus.
