Liverpool e fiton derbin e qytetit, mbetet lider i Premierligës
Ekipi i Liverpool-it, më vështirë nga sa pritej, e mposhti Everton-in me rezultat 2-1 në derbin e madh të qytetit, ndeshje e vlefshme për xhiron e pestë të Premierligës angleze.
Kampioni aktual e nisi fuqishëm ndeshjen, duke kaluar shpejt në epërsi me golin e Ryan Gravenberch, ndërsa në minutën e 29-të Hugo Ekitike e dyfishoi rezultatin. Everton në pjesën e parë u duk i pafuqishëm përballë favoritit, por në vazhdim pamja ndryshoi.
Liverpool-i shkoi në pushim me avantazh 2-0, por ai u përgjysmua në minutën e 58-të kur Idrissa Gueye shënoi pas një aksioni të mirë të Jack Grealish dhe Iliman Ndiaye.
Trajneri Arne Slot reagoi me disa zëvendësime, duke futur në lojë Curtis Jones, Florian Wirtz dhe Alexander Isak, çka i stabilizoi disi “të kuqtë” dhe i bëri më të sigurt në minutat e fundit.
Everton tentoi deri në fund të nxjerrë barazimin nga “Anfield”, por skuadra e David Moyes nuk kishte më forca për ta befasuar kampionin anglez.
Për Liverpool-in kjo ishte fitorja e pestë radhazi në po aq ndeshje, me çka e ruan pozitën e parë në tabelë. Everton mbetet me shtatë pikë, në vendin e shtatë.
