Havertz paralajmëron rivalët: Arsenali synon t’i fitojë të gjithë trofetë
Kai Havertz ka dërguar një mesazh të qartë për rivalët e Arsenalit, duke deklaruar se skuadra londineze synon të luftojë për të gjithë trofetë këtë sezon.
Sulmuesi gjerman beson se Arsenali ka cilësinë e nevojshme për të konkurruar në çdo front, pas një starti mbresëlënës të sezonit.
“Topçinjtë” e nisën sezonin duke mposhtur Manchester Cityn dhe duke fituar Community Shield, ndërsa më pas regjistruan fitore në dy ndeshjet e para të Premier League.
Havertz theksoi se suksesi i sezonit të kaluar ka rritur edhe më shumë urinë për trofe.
“Kur e shijon fitimin e një titulli, dëshiron ta bësh përsëri. Ne kemi një ekip që mund të konkurrojë për çdo trofe. Vitin e kaluar ishte vetëm një, por këtë vit ka shumë më tepër për të fituar dhe ne duam t’i fitojmë të gjithë”, deklaroi Havertz.
Megjithatë, gjermani pranon se pjesa më e vështirë e sezonit është ende përpara, pasi Arsenali do të ketë një kalendar të ngjeshur me ndeshje në Premier League, Champions League, Carabao Cup dhe FA Cup.
“Ka ende një rrugë të gjatë për të bërë dhe tani fokusi ynë është vetëm te ndeshja e radhës. Kemi bërë disa hapa të mirë, duke fituar Community Shield dhe dy ndeshjet e para të sezonit”, u shpreh ai.
“Por tani fillojnë edhe Champions League, Carabao Cup dhe FA Cup. Do të ketë ndeshje çdo tri ditë. Duhet të tregojmë se për çfarë jemi të aftë”, shtoi Havertz.
Në fund, sulmuesi gjerman nënvizoi ambicien e skuadrës për të dhënë maksimumin dhe për t’i dhuruar Arsenalit sa më shumë trofe këtë sezon.
“Jemi pozitivë dhe duam të japim gjithçka këtë sezon për t’i arritur përsëri objektivat tona dhe për t’i sjellë më shumë tituj klubit”, përfundoi Havertz.
