Haaland dhe Rodri te Real Madridi? Premtimi bombastik i rivalit të Perez për president ndez fushatën

Enrique Riquelme ka zbuluar se Erling Haaland dhe Rodri do të jenë dy nënshkrimet e tij kryesore nëse ai fiton zgjedhjet presidenciale të Real Madridit të dielën, duke bërë një deklaratë mjaft të guximshme gjatë një paraqitjeje në emisionin e njohur spanjoll “El Hormiguero”.

Biznesmeni spanjoll, i cili po sfidon Florentino Perezin për kreun e klubit mbretëror, më parë kishte njoftuar emërimin e legjendave të klubit si Raul Gonzalez në rolin e drejtorit sportiv dhe Fernando Hierro si drejtues të akademisë, por tani ai ka shkuar një hap më tej duke ndezur maksimalisht fushatën elektorale.

Ai u tregua shumë ambicioz duke u zotuar se dy yjet e Manchester Cityt, sulmuesi norvegjez Haaland dhe mesfushori spanjoll Rodri, do të jenë dy blerjet e tij të para nëse arrin të zgjidhet president i Real Madridit.

“Erling Haaland dhe Rodri janë nënshkrimet e mia yje nëse bëhem president i Real Madridit”, ka thënë prerazi Riquelme.

Haaland ka qenë në një formë të jashtëzakonshme për Manchester Cityn që nga mbërritja e tij në vitin 2022, duke e vendosur veten si një nga sulmuesit më të mirë në futbollin botëror. Ndërkohë, Rodri (fituesi i Topit të Artë në vitin 2024) konsiderohet gjerësisht si mesfushori defensiv më i mirë në planet.

Sigurimi i qoftë edhe njërit prej këtyre lojtarëve do të përfaqësonte një transferim monumental për çdo klub, e lëre më marrja e të dyve njëkohësisht. Nëse ky vizion i Riquelmes është vërtet i realizueshëm apo mbetet thjesht një premtim i bujshëm fushate, kjo mbetet për t’u parë, duke pasur parasysh se Manchester City vështirë se do të pranonte lehtësisht oferta për shtyllat e saj kryesore.

Zgjedhjet e së dielës kundër Florentino Perez do të përcaktojnë nëse këto ambicie të mëdha do të përparojnë ndonjëherë drejt realizimit apo do të mbyllen pas votimeve.