Gasperini, mjeshtri i sistemit; A do të funksionojë magjia e tij te Roma?

Gian Piero Gasperini nuk ka më nevojë për prezantim. Ajo që bëri me Atalantën është e jashtëzakonshme. Jo vetëm që ngriti një skuadër që konkurroi me më të mëdhatë e Italisë dhe Evropës, por e bëri këtë pa emra të mëdhenj e pa buxhete marramendëse. Ai ndërtoi – nga themeli.

Nga Genoa tek Atalanta – filozofi ndërtimi

Ende pa ardhur në Bergamo, Gasperini kishte nisur të ndërtonte themele të forta te Genoa. Atje nuk synohej fitorja me çdo kusht, por zhvillimi i talenteve, krijimi i një stili loje dhe krijimi i vlerës për klubin. Ai e përsosi këtë filozofi te Atalanta, ku bashkë me drejtorin sportiv Giovanni Sartori, krijoi një model që prodhonte lojtarë, rezultate dhe fitime.

Shumë futbollistë u ngritën në elitë nën drejtimin e tij – por nuk shkëlqyen më pas, si Gagliardini apo Cristante. Ky është tregues i qartë se Gasperini nuk e gjen suksesin – ai e ndërton atë.

Nga talente në trofe – kulmi në Ligën e Evropës

Gasperini e çoi Atalantën në nivele që askush nuk i kishte imagjinuar. Arritja më e madhe: titulli në UEFA Europa League, që për shumëkënd do të ishte tingëlluar si fantashkencë para disa vitesh. Dhe e gjitha kjo me një futboll sulmues, dinamik dhe modern.

Tani Roma: sfida e madhe

Tashmë, emri i Gasperinit përmendet me ngulm për AS Roma. Pyetja që lind natyrshëm: a mund ta përsërisë këtë sukses në kryeqytet?

Në letër, po. Por Roma është një botë më vete – një klub ku shumë ide kanë dështuar para se të nisin. Kujtoni rastin e Luis Enrique: një trajner me vizion, por që u “përpi” nga kaosi i brendshëm dhe mungesa e durimit.

A është Roma gati për Gasperinin?

Për të pasur sukses, Gasperini ka nevojë për mbështetje totale dhe për një strukturë që beson në projektin e tij afatgjatë. Pa këtë, edhe më të mirët nuk mund të funksionojnë.

Gasperini është i gatshëm për një hap të madh. Pyetja është: a është Roma e gatshme për të?