Fenerbahçe i Mourinhos barazon në shtëpi ndaj Benfica-s
Fenerbahçe dhe Benfica barazuan 0-0 të martën në ndeshjen e parë të play-off-it të Ligës së Kampionëve, duke lënë gjithçka të hapur për ndeshjen e kthimit më 27 gusht në Lisbonë.
Skuadra e Jose Mourinhos pati epërsi numerike për më shumë se 20 minuta, pasi mesfushori i Benficas Florentino u ndëshkua me kartonin e dytë të verdhë në minutën e 71-të. Megjithatë, turqit nuk arritën të përfitonin, pavarësisht presionit të vazhdueshëm në pjesën e dytë.
Loja nisi e kujdesshme, me pak raste deri pas gjysmës së parë. Akturkoglu kërcënoi dy herë nga goditjet e dënimit për Benficën, ndërsa portieri Irfan Egribayat bëri disa pritje vendimtare për Fenerbahçen. Sulmuesi El-Nesyri dhe John Duran patën mundësi të mira për vendasit, por rezultati mbeti i pandryshuar deri në pushim.
Në pjesën e dytë, Fenerbahçe shtoi ritmin ofensiv. Fred u afrua te goli, ndërsa zëvendësuesi Anderson Talisca shënoi një herë, por goli u anulua për pozicion jashtë loje. Mourinho futi në lojë forca të reja sulmuese, por Benfica, edhe me një lojtar më pak, mbajti rezultatin deri në fund.
Në ndeshjet tjera të së mërkurës, kampioni norvegjez Bodo/Glimt dominoi Sturm Graz-in me rezultat 5-0, duke hedhur një hap të madh drejt fazës së grupeve. Katër lojtarë të ndryshëm shënuan për vendasit, ndërsa goli i pestë erdhi nga një autogol i lojtarit mysafir Boving.
Ndërkohë, Basel barazoi 1-1 me Copenhagen me golin e Xherdan Shaqiri, duke e lënë të hapur duelin për kualifikim, ndërsa Celtic nuk shkoi më shumë se 0-0 kundër Kairat Almaty në Glasgow, pavarësisht epërsisë së pritshme para ndeshjes.
