Drita një hap larg historisë në Ligën e Konferencës!
FC Drita ka bërë një hap të madh drejt kualifikimit në fazën e grupeve të Ligës së Konferencës. Kampionët e Kosovës mbrëmjen e së enjtes triumfuan 2:1 ndaj Differdange 03 të Luksemburgut, në stadiumin “Fadil Vokrri” në Prishtinë, në ndeshjen e parë të fazës “play-off”.
Albert Dabiqaj (30’) hapi serinë e golave për gjilanasit, ndërsa Besnik Krasniqi (80’), nga pika e bardhë, vulosi fitoren e madhe. Për mysafirët, Andreas Buch (65’) barazoi përkohësisht rezultatin.
Skuadra nga Luksemburgu e mbylli ndeshjen me 10 futbollistë, pasi në minutën e 92-të Boris Mfoumou u ndëshkua me karton të kuq pas një ndërhyrjeje ndaj Krasniqit.
Takimi i kthimit zhvillohet javën e ardhshme në Luksemburg, ku Drita kërkon të kompletojë suksesin dhe të shkruajë historinë e saj evropiane.
Kujtojmë se gjilanasit e kishin mposhtur Differdangen edhe në rrethin e parë kualifikues të Ligës së Kampionëve këtë edicion.
Nëse Drita siguron kalimin, kundërshtarët e mundshëm në fazën e grupeve do t’i mësojë në shortin e 29 gushtit.
