Amorim flet për të ardhmen e Leaos: Është lojtar i Milanit derisa të veshë këtë fanellë

Trajneri i Milanit, Ruben Amorim, ka dërguar një mesazh të qartë lidhur me të ardhmen e Rafael Leaos, mes spekulimeve të vazhdueshme për largimin e sulmuesit portugez gjatë kësaj vere.

Nga turneu parasezonal në Australi, Amorim theksoi se për të skuadra është prioritet absolut dhe se Leao mbetet lojtar i Milanit për aq kohë sa mbron ngjyrat kuqezi.

“Për mua, skuadra është gjëja më e rëndësishme. Do të flas me Rafael Leaon, Ramosin, Saelemaekersin dhe të gjithë lojtarët që rikthehen nga Kupa e Botës për t’u shpjeguar se si do të punojmë. Ata e dinë çfarë do të thotë të luash për një klub si Milani”, deklaroi Amorim.

Tekniku portugez pranoi se merkatoja sjell shumë zëra, por nënvizoi se kjo nuk ndryshon qasjen e klubit ndaj futbollistëve.

“E di që ka shumë thashetheme për disa nga lojtarët tanë, por ata janë lojtarët tanë derisa të mos ndërrojnë fanellën. Objektivi ynë është të përgatisim skuadrën sa më mirë për ndeshjen e parë të sezonit dhe jemi plotësisht të përqendruar te kjo”, u shpreh ai.

Amorim shtoi se konkurrenca për një vend në formacion do të jetë e barabartë për të gjithë.

“Të gjithë do të stërviten dhe do të luftojnë për një vend në skuadër. Çdo lojtar është i ndryshëm dhe duhet trajtuar si individ, por rregullat janë të njëjta për të gjithë. Duam të punojmë fort, të shijojmë futbollin, të ndihmojmë ekipin dhe të ndërtojmë një lidhje të fortë me tifozët”, përfundoi trajneri i Milanit.