Chelsea ngec në barazim, Newcastle triumfon ndaj Tottenham me spektakël dhe gola
Chelsea nuk arriti të merrte më shumë se një barazim 1-1 kundër Crystal Palace në një ndeshje që nisi mirë për “Blutë” e Londrës. Chelsea kaloi në avantazh pas 25 minutash lojë me golin e shënuar nga Jackson, pas një asistimi të shkëlqyer nga Cole Palmer. Pjesa e parë u mbyll me avantazhin e Chelsea-s, me Palmer që tregoi klas dhe efikasitet në lojën e tij.
Por situata ndryshoi në pjesën e dytë. Crystal Palace intensifikoi sulmet, duke e shtyrë Chelsea-n në mbrojtje dhe arriti të barazonte me golin e Eze në minutën e 54-të. Pavarësisht përpjekjeve nga të dy ekipet, asnjëra nuk arriti të gjente golin e fitores, dhe ndeshja përfundoi me rezultat të barabartë.
Në anën tjetër, ndeshja mes Newcastle dhe Tottenham ofroi spektakël dhe gola. Newcastle arriti të triumfojë 2-1, falë golave të shënuar nga Barnes dhe Isak. Edhe pse një autogol nga Burn rriti tensionin, performanca e Newcastle ishte e mjaftueshme për t’i siguruar tri pikët në këtë përballje të zjarrtë.
