Malisheva turpërohet në Islandë
Malisheva ka përjetuar një natë për t’u harruar në Islandë, duke u mposhtur thellë nga skuadra islandeze Vikingur Reykjavik, me rezultat 8:0 në ndeshjen e kthimit të raundit të parë të Ligës së Konferencës.
Kjo humbje, e cila është më e rënda ndonjëherë për një skuadër kosovare në garat evropiane, e përmbylli aventurën e Malishevës në arenën evropiane me rezultat të përgjithshëm 9:0, pas humbjes 1:0 në ndeshjen e parë të zhvilluar në “Fadil Vokrri”.
Megjithëse në përballjen e parë tregoi organizim dhe rezistencë, Malisheva shkoi në Islandë me besimin se mund të përmbyste disavantazhin minimal, por u përball me një realitet krejt tjetër. Vikingur dominoi nga minuta e parë dhe nuk i la asnjë hapësirë skuadrës nga Kosova për të reaguar.
Për skuadrën e Bekim Isufit, kjo ndeshje shërben si një leksion për të ardhmen, ku niveli dhe intensiteti i garave ndërkombëtare kërkojnë përgatitje dhe eksperiencë më të madhe.
