Vizioni i ri – 80 skuadra do të luajnë në Superligë
Historia e kompeticionit të ri elitar të futbollit në Evropë, Superligës, po bëhet sërish aktuale. Dy vite më parë, UEFA, me presion, dërrmoi idenë e krijimit të Superligës, nga e cila Reali, Barcelona dhe Juventus nuk hoqën dorë kurrë.
Superliga tani ka një vizion të ri me 80 ekipe në një sistem shumë ligash, tha drejtori ekzekutiv i kompeticionit.
Liga do të bazohet në rezultatet sportive, pa anëtarë të përhershëm, tha Bernd Reichart për gazetën gjermane Die Welt.
Ekipeve do t’u garantoheshin minimalisht 14 ndeshje në sezon dhe sponsori kryesor doli me një propozim për këtë format pasi u konsultua me pothuajse 50 klube evropiane që nga tetori i vitit të kaluar, të cilët së bashku zhvilluan dhjetë parime bazë.
Bëhet fjalë për kompaninë “A22 Sport Management”, e cila mbështeti planin origjinal të Superligës nga viti 2021, i cili parashikonte një sistem të mbyllur të kontrolluar nga 12 klube, gjë që hasi në reagimin e ashpër të publikut futbollistik.
“Themelet e futbollit evropian rrezikojnë të shemben. Është koha për një ndryshim. Janë klubet që mbajnë rrezikun e sipërmarrjes në futboll. Por kur merren vendime të rëndësishme, ata shpesh detyrohen të ulen mënjanë, ndërsa themelet sportive dhe financiare shkatërrohen rreth tyre”, theksoi Reichart.
“Diskutimet tona e kanë bërë të qartë se shpesh nuk është e mundur që klubet të flasin publikisht kundër një sistemi që përdor kërcënimin e sanksioneve për të ndaluar opozitën. Dialogu ynë ishte i hapur, i sinqertë, konstruktiv dhe rezultoi në ide të qarta se çfarë ndryshimesh nevojiten dhe si mund të zbatohen ato. Ka shumë për të bërë dhe ne do të vazhdojmë dialogun tonë”, shtoi ai.
Reichart pretendon se A22 sfidoi të drejtën e UEFA-s dhe FIFA-s për të bllokuar formimin e Superligës dhe për të sanksionuar klubet rivale në gjykata, duke pretenduar se organet drejtuese po abuzonin me një pozicion dominues sipas ligjit të konkurrencës të BE-së.
Ai pohoi gjithashtu se Superliga do të ishte një garë e hapur, me kualifikim përmes performancës në nivel kombëtar dhe të gjitha skuadrat e saj do të garojnë në ligat e tyre vendase.
Këto liga kombëtare do të mbeten “themeli” i sportit, thotë Reichart, i cili pretendon se Superliga do të gjenerojë të ardhura të reja për të mbështetur të gjithë piramidën e garave.
Garancia me 14 lojëra, thotë Reichart, do të sigurojë “stabilitet dhe parashikueshmëri” të të ardhurave.
Reichart përshkroi planet për masat e kontrollit të kostos, duke thënë se klubet duhet të shpenzojnë vetëm një përqindje fikse të të ardhurave të tyre vjetore të futbollit për pagat e lojtarëve dhe transferimet neto.
“Shpenzimet e klubit duhet të bazohen vetëm në asetet e krijuara, jo në infuzione kapitale që shtrembërojnë konkurrencën”, nënvizoi Reichart.
