Spalletti: Nuk mund t’ia faturojmë gjithçka mungesës së fatit

Luciano Spalletti ka folur në prag të ndeshjes ndaj Lecce, një duel i rëndësishëm për garën drejt Ligës së Kampionëve, duke kërkuar reagim pas barazimit ndaj Veronës.

“Duam të rikthehemi nga pjesa e fundit e ndeshjes së kaluar. Jo gjithçka duhet hedhur poshtë, sepse publiku e pa angazhimin dhe cilësinë tonë. Gabimi më i madh do të ishte të justifikohemi me mungesën e fatit,” u shpreh ai.

Duke folur për kundërshtarin, Spalletti vlerësoi organizimin e skuadrës: “Luajmë ndaj një ekipi të strukturuar mirë. E njoh Di Francesco dhe Corvinon, dhe na pret një ndeshje ku duhet të japim maksimumin për të marrë rezultat.”

Sa i përket formacionit, ai la të hapur mundësinë për Vlahović: “Mund të jetë titullar, por nuk duhet t’i vendosim mbi supe shumë përgjegjësi.”

Trajneri pranoi edhe aspektin psikologjik të momentit: “Kur nuk fiton, atmosfera në dhomën e zhveshjes rëndohet. Por vështirësitë të forcojnë.”

Në fund, Spalletti u ndal edhe te performanca e skuadrës dhe zgjedhjet e tij: “Jam i kënaqur me cilësinë në kampionat, por disa momente kyçe na kanë kushtuar shumë. Sa i përket Openda, është profesionist, por kam zgjedhur lojtarët që mendova se na ndihmojnë më shumë.”