Michael Owen: Dembele favorit për Topin e Artë
Legjenda e Liverpoolit, Michael Owen, beson se sulmuesi i Paris Saint-Germain, Ousmane Dembele, është kandidati kryesor për të fituar Topin e Artë 2025.
Duke folur për Sportskeeda, Owen tha se francezi ka bërë një sezon të jashtëzakonshëm, duke e vlerësuar mbi Mohamed Salah dhe talentin e Barcelonës, Lamine Yamal.
“Yamal duhet të ketë një shans të mirë. Ai është jashtëzakonisht i talentuar. Mendova se Paris Saint-Germain ishte i shkëlqyer sezonin e kaluar dhe mendoj se Dembele do të ishte zgjedhja ime. Mo Salah gjithmonë meriton të përmendet, por këtë herë PSG e ndryshoi ekuilibrin. Personalisht, do të votoja për Dembele”, tha Owen.
Dembele luajti 53 ndeshje për PSG-në në sezonin 2024/25, duke shënuar 35 gola dhe dhënë 16 asiste. Parisienët fituan trefishin historik: Champions League, Kupën e Francës dhe Ligue 1.
