Lumbardha Misini nënshkruan me Servette FC Chênois Féminin, e uron Ademi
Futbollistja e Kombëtares së Kosovës, Lumbardha Misini, ka realizuar një hap të rëndësishëm në karrierën e saj, duke u transferuar nga Trabzonspori tek klubi i njohur zviceran, Servette FC Chênois Féminin, që garon në ligën elitare të futbollit për femra në Zvicër. Ky transferim përbën një tjetër sukses për futbollin e femrave në Kosovë dhe dëshmon rritjen e vazhdueshme të cilësisë së futbollisteve që përfaqësojnë ngjyrat dardane në arenën ndërkombëtare. Presidenti i Federatës së Futbollit të Kosovës, Agim Ademi, ka përgëzuar Misinin për këtë arritje, duke theksuar se ky është një moment krenarie për gjithë komunitetin e futbollit kosovar.
“Ky është një hap i madh për karrierën e Lumbardhës dhe një tjetër dëshmi e cilësisë së futbollisteve tona që tashmë po shkëlqejnë edhe jashtë vendit. Federata e Futbollit e Kosovës i uron Lumbardhës shumë suksese në aventurën e re dhe është krenare që një tjetër përfaqësuese e jona do t’i tregojë vlerat e saj në një ligë prestigjioze evropiane”, ka shkruar Ademi. Misini ka qenë pjesë e rregullt e Kombëtares së Kosovës në konkurrencën e vajzave, ku ka treguar formë të mirë dhe përkushtim maksimal në çdo paraqitje. Kalimi i saj në Servette FC Chênois Féminin pritet t’i hapë dyer të reja në zhvillimin profesional, si dhe të kontribuojë në përvojën e saj ndërkombëtare. Ky lëvizje shihet edhe si një motivim për vajzat e reja që synojnë një karrierë në futboll, duke pasur shembuj konkretë si Lumbardha Misini që tregojnë se ëndrrat mund të realizohen me punë dhe përkushtim.
