Flick kritikon Spanjën për menaxhimin e dëmtimit të Lamine Yamal
Trajneri i Barcelonës, Hansi Flick, akuzoi të shtunën Federatën Spanjolle të Futbollit për keqmenaxhimin e Lamine Yamal, duke thënë se lojtari i ri u rikthye nga kombëtarja me dhimbje pas përdorimit të analgjezikëve.
“Yamal nuk do të jetë i gatshëm ndaj Valencias. Është për të ardhur keq, por u kthye nga kombëtarja me dhimbje dhe nuk është gati,” tha Flick.
Ai kritikoi hapur mënyrën si Spanja e trajtoi lojtarin 17-vjeçar. “Shkoi me shqetësime dhe u kthye me dhimbje. Në kombëtare i dhanë analgjezikë, luajti 79 minuta në ndeshjen e parë dhe 73 në të dytën. Kjo nuk është mënyra e duhur për t’u kujdesur për lojtarët. Spanja ka lojtarë të mëdhenj dhe duhet t’i mbrojë. Jam i trishtuar”, tha trajneri gjerman.
Flick shtoi se komunikimi me trajnerin e Spanjës është i kufizuar. “Nuk kam folur me të, vetëm një mesazh i kam dërguar. Unë nuk flas mirë spanjisht, ai nuk flet mirë anglisht. Është e qartë që komunikimi duhet të përmirësohet,” tha ai.
Barcelona konfirmoi se Yamal ka një hematomë të fortë në zonën e pubisit, duke e vënë në dyshim pjesëmarrjen e tij ndaj Newcastle në ndeshjen hapëse të Champions League. Klubi është pesimist për rikuperimin e tij në kohë për transfertën angleze.
