Capello mbështet transferimin e Hojlund te AC Milan: Allegri do ta ndihmojë në karrierë

Fabio Capello, ish-trajner legjendar i AC Milan, i ka dhënë përkrahje të plotë interesimit të klubit për sulmuesin e Manchester United, Rasmus Hojlund.

Sulmuesi danez mund të largohet nga “Djajt e Kuq” për rreth 30 milionë funte, pasi ardhja e Benjamin Sesko nga RB Leipzig ka reduktuar mundësitë e tij për paraqitje në ekip.

Në një intervistë për Sky Italia, Capello tha: “E njoh mirë Hojlundin, ka treguar potencial të madh, edhe pse ka pasur periudha të vështira te Manchester United. Një sfidë si ajo te AC Milan do t’i bëjë shumë mirë.”

“Mosha e tij dhe një trajner me përvojën e Massimiliano Allegrit do ta ndihmojnë shumë në zhvillimin e karrierës.”

Hojlund ka kontratë me Manchester United deri në vitin 2028, por duket se po afron drejt një kalimi në Serie A, ku synon të rigjejë formën dhe kontributin e tij në fushë.