Ballkani e kalon edhe një pengesë drejt mbrojtjes së titullit
Kampioni i dy edicioneve të fundit në elitën e futbollit të Kosovës, Ballkani, ka fituar të dielën në udhëtim te Gjilani dhe mbetet në vendin e parë në Superligë.
Ballkani fitoi 2:0 në ndeshjen që u zhvillua në terrenin me bar sintetik në Gjilan, me dy gola të shënuar në pjesën e dytë.
Nazmi Gripshi në minutën e 49-të dhe Lumbardh Dellova në minutën e 81-të, i shënuan golat e fitores për skuadrën që drejtohet nga trajneri Ilir Daja.
Ballkani lider ka 63 pikë, dy më shumë se Llapi e Drita.
Gjilani është i shtati me 34 pikë, aq sa ka edhe Feronikeli 74 në vendin e tetë, përkatësisht atë që dërgon në barazh.
Në xhiron e 32-të, Ballkani luan në shtëpi kundër Dukagjinit, teksa Gjilani udhëton te Malisheva.
