Kina është ende në kalendarin e Formula 1

Nov 24, 2022

Çmimi i Madh i Kinës në Formula 1, i cili nuk është mbajtur që nga viti 2019 për shkak të pandemisë së koronavirusit, aktualisht është ende në kalendar për sezonin 2023, tha një zëdhënës i Formula 1.

Transmetuesi publik britanik BBC njoftoi dje se gara do të anulohet për shkak të politikave strikte të këtij vendi ndaj koronavirusit.

“Ne vazhdojmë të monitorojmë situatën me Covid-19 në Kinë dhe mbajmë kontakte të ngushta me autoritetet. Kina është përfshirë në kalendarin për vitin 2023 dhe derisa të njoftojmë ndryshe, ajo mbetet siç është planifikuar”, thanë zyrtarë të Formula 1.

Çmimi i Madh i Kinës, i mbajtur në Shangai, është planifikuar për 16 prill 2023 dhe është caktuar të jetë gara e katërt e sezonit, e cila do të arrijë një rekord prej 24 garash. Nëse anulohet, nuk ka gjasa që data të riplanifikohet. Një sezon me 23 gara do të ishte ende një rekord.

“Pika kryesore e mosmarrëveshjes është se stafi i F1 nuk do të përjashtohet nga karantina në rast të një infeksioni Covid-19”, raportoi BBC. Kina ka zbatuar me vendosmëri një politikë të tolerancës zero për Covid-19 që përfshin ndalime të rrepta, karantinë për ata që rezultojnë pozitiv dhe pothuajse çdo ditë teste PCR, duke shkaktuar pakënaqësi në rritje në mesin e popullatës.