Pioli: Nxituam, e harruam mbrojtjen!

Milani u largua nga Kupa e Italisë pasi humbi 0:1 në ‘San Siro’ ndaj skuadrës së Torinos. Shënues i golit të vetëm në ndeshje ishte Michel Ndari Adopo, në minutën e 114-të.

“Rosonerët” realizuan deri në 14 goditje, tetë prej të cilave brenda portës, por nuk e tundën rrjetën kundërshtare edhe pse kishin një lojtar më shumë në fushë nga minuta e 70-të.

Trajneri Stefano Pioli pas ndeshjes u përpoq të qëndronte i qetë dhe të jepte një shpjegim logjik për humbjen.

“Ne luajtëm në mënyrë agresive dhe vendosmërisht kundër një kundërshtari të vështirë. Megjithatë, ne nuk treguam cilësinë dhe mprehtësinë e nevojshme për të kapitalizuar epërsinë tonë. Ne nxituam duke u përpjekur të shënonim dhe harruam mbrojtjen. Është një zhgënjim i madh sepse ne donim të ecnim përpara në Kupë”, tha Pioli.