Union Berlin ia merr një pikë Napolit, Sosiedadi bindës ndaj Benficës
Napoli barazoi në mënyrë befasuese para tifozëve të vet kundër Union Berlin, ndërsa Real Sociedad mposhti Benfikën në ndeshjet e para të raundit të katërt në grupet A, B, C dhe D, që zhvillohen sonte.
Union Berlin mori pikën e parë në Champions League dhe i dha fund serisë së keqe, prej 12 humbjeve radhaz. Napoli përjetoi një dështim të paplanifikuar (1:1) dhe tani me siguri humbi shanset për vendin e parë në Grupin C.
Napoli kaloi në epërsi me golin e Politanos në minutën e 39-të, por Fofana shënoi rezultatin përfundimtar në minutën e 52-të. Kapiteni i Kombëtares sonë, Amir Rrahmani pati paraqitje të mirë në këtë takim, por mungoi finalizimi i aksioneve nga baahkëlojtarët e tij.
Në tabelën e grupit C kryeson Reali me nëntë pikë (nga ora 21:00 luan me Bragën), Napoli ka shtatë, Braga tre dhe Union Berlin një pikë.
Real Sociedad e çmontoi Benfikën, me rezultat 3:1. Në 20 minuta, skuadra baske shënoi tre gola dhe dy të tjerë ia anuloi VAR-i.
Pas gjashtë minutash lojë Merino shënoi golin e parë, në minutën e 11-të Ojerzabal shënoi golin e dytë dhe në minutën e 21-të Barenechea u përkujdes për golin e tretë. Pjesa e dytë i takoi Benfikës. Portugezët shkurtuan rezultatin në minutën e 48-të me golin e Rafa Silvës, por nuk patën forcë për asgjë më shumë.
Në grupin D, Sociedadi ka 10 pikë, Interi shtatë dhe një ndeshje më pak, Salzburgu tre e një ndeshje më pak, dhe Benfica është ende pa pikë . Nëse Interi mund Salzburgun sonte, Sociedadi dhe Interi do të kalojnë në raundin tjetër.
