Luis Enrique: Epoka e re e PSG-së pa Mbappe – një sfidë emocionuese

Trajneri i Paris Saint-Germain, Luis Enrique, ka reflektuar mbi epokën e re të klubit, ku skuadra do të luajë pa yllin e saj, Kylian Mbappe. Enrique shprehet se zëvendësimi i një sulmuesi që shënon 40 gola në sezon, si Mbappe, është një sfidë e madhe, por ai është optimist se ekipi mund të përshtatet me këtë ndryshim.

“Si të zëvendësohet një sulmues që shënon 40 gola në sezon? Nga përvoja ime, e di që është më mirë të kesh katër lojtarë që shënojnë nga 12 gola secili,” tha Enrique. “Është një sfidë emocionuese, një sfidë për të treguar se ky është një sport ekipi. Ne mund ta bëjmë këtë, ky është qëllimi ynë”, tha ai.

Enrique gjithashtu theksoi se gara për titull do të jetë e vështirë, duke mos marrë asgjë si të mirëqenë. Ai beson se kampionati francez është mjaft konkurrues dhe ekipet janë përforcuar, duke shtuar se sezoni i kaluar tregoi një nivel të lartë gare.

“Nuk mendoj se është një kampionat i lehtë, përkundrazi. Vitin e kaluar kemi pasur një nivel shumë të lartë. Shpresoj që ekipi im të vazhdojë të evoluojë, dhe jam shumë i kënaqur me skuadrën që kam,” shtoi ai.

Trajneri spanjoll theksoi gjithashtu se PSG do të vazhdojë të zhvillojë projektin e saj, duke mos përjashtuar mundësinë e përforcimeve të tjera në merkato. Megjithatë, ai pranon se është e vështirë të përmirësosh një ekip tashmë shumë cilësor.

“Lider i skuadrës është klubi, PSG. Si skuadër duam të jemi më solidë, në mbrojtje dhe në sulm”, përfundoi Enrique.