Inzaghi: Fryma e ekipit solli fitoren për Interin

Interi bëri një hap drejt çerekfinaleve të Ligës së Kampionëve pasi mposhti skuadrën e Portos me rezultat 1:0. Golin e shënoi Romelu Lukaku, por trajneri Simone Inzaghi nuk ngurroi të vlerësojë të gjithë ekipin që arriti sukses.

“Të gjithë performuan mirë, skuadra kishte nevojë për kontributin e të gjithëve. E dimë se ka ende shumë ndeshje përpara nesh këtë sezon. Të gjithë do të kenë shansin e tyre”, tha Inzaghi pas triumfit.

Trajneri i Nerazzurrëve ka komentuar edhe vështirësitë që ka hasur skuadra e tij në rrugën drejt fitores. Porto u dorëzua vetëm pasi mbeti me dhjetë lojtarë në fushën e “Giuseppe Meazza”.

“Kemi luajtur mirë kundër një skuadre shumë të fortë fizikisht. Më vjen keq që nuk arritëm të konvertonim disa nga rastet që patëm në pjesën e parë. Ne donim të arrinim diçka më shumë, por pavarësisht kësaj performanca jonë ishte e shkëlqyer”, shtoi trajneri i Interit.

Interi ka një mundësi të madhe për të arritur në çerekfinale të Ligës së Kampionëve për herë të parë në 12 vitet e fundit.