Hazard flet për presionin ndaj Vinicius: Mund të largohet nga futbolli herët
Eden Hazard ka folur për presionin që përjeton Vinícius Júnior, duke thënë se nuk do të ishte i befasuar nëse ylli brazilian do të vendoste të tërhiqej nga futbolli relativisht herët.
Ish-futbollisti belg, i cili ndau disa sezone te Real Madrid me Vinícius, theksoi se sulmuesi brazilian përballet me një presion të madh jashtë fushës, që shpesh e tejkalon atë që ndodh në fushën e lojës.
Në një intervistë për RTBF, Hazard tha se situata të tilla mund të ndikojnë shumë te një futbollist.
“Ke kaq shumë gjëra në kokë para një ndeshjeje, sa ndonjëherë mendon edhe të ndalesh. E di që ai mund ta përjetojë këtë, edhe pse pak gjë ndryshon me ndëshkimet. Kjo është një barrë e madhe, prandaj nuk do të më habiste nëse në moshën 30-vjeçare do të thoshte se largohet nga futbolli”, u shpreh Hazard.
Hazard, i cili i dha fund karrierës profesionale në moshën 32-vjeçare, kujtoi se gjatë katër sezoneve te Real Madridi luajti 27 ndeshje së bashku me Vinícius. Ai vlerësoi veçanërisht forcën mendore dhe fizike të brazilianit për të përballuar presionin.
Sipas tij, aktualisht diskutohet më shumë për atë që Vinícius përjeton jashtë fushës sesa për performancat e tij në lojë.
“Njerëzit harrojnë se sa lojtar i jashtëzakonshëm është”, theksoi Hazard.
Në fund, ish-mesfushori belg tha se Vinícius është një futbollist që dëshiron thjesht të luajë dhe të argëtohet në fushë.
“Nëse do t’i jepja një këshillë, do t’i thosha: luaj si të duash, por me kujdes. Shijoje futbollin dhe bëji tifozët e vërtetë të kënaqen”, përfundoi Hazard.
