Ferizaj fiton në fund ndaj Malishevës dhe merr tri pikë të arta për mbijetesë
Ferizaj ka marrë një fitore shumë të rëndësishme në garën për mbijetesë në Superligën e Kosovës, duke e mposhtur Malishevën me rezultat 2:1 në udhëtim, në kuadër të xhiros së 24-t.
Ndeshja u zhvillua në stadiumin “Liman Gegaj” në Malishevë, ndërsa goli vendimtar u shënua në minutën e dytë të kohës shtesë. Ruben Silva realizoi për 2:1 në minutën e 92-të, duke ia siguruar Ferizajt tri pikë shumë të vlefshme.
Malisheva kaloi e para në epërsi në minutën e 12-të me golin e Mevlan Zekës nga penalltia. Gjyqtari Mervan Bejtullahu akordoi penalltinë pas rishikimit të situatës në VAR, ku u konstatua prekje me dorë e Ade Ogunsit në zonë.
Edhe goli i barazimit për Ferizajn erdhi nga pika e bardhë. Në minutën e 35-të, Ade Oguns u tregua i saktë nga penalltia për rezultatin 1:1, duke shlyer gabimin e bërë në golin e parë të Malishevës.
Kur ndeshja po shkonte drejt barazimit, Ferizaj arriti ta gjejë golin e fitores në kohën shtesë me Ruben Silvan, që realizoi në minutën e 92-të.
Pas kësaj fitoreje, Ferizaj ngjitet në vendin e tetë, që dërgon në barazh, me 26 pikë. Drenica është e nënta me 25 pikë, ndërsa Prishtina e Re mbetet e fundit me 23 pikë.
Në anën tjetër, Malisheva mbetet në vendin e katërt me 37 pikë, një më pak se Prishtina që renditet e treta.
