Dukagjini mposht Llapin – shënon fitore të rëndësishme për mbijetesë

Dukagjini ka regjistruar një fitore të madhe ndaj Llapit në kuadër të javës së 27-të të Albi Mall Superligës së Kosovës në futboll.

Skuadra nga Klina triumfoi me rezultat 3:1 në stadiumin “18 Qershori”, duke vazhduar formën e mirë në garën për t’iu shmangur zonës së rrezikshme.

Hekuran Berisha i dha epërsinë Dukagjinit në minutën e 36-të, gol që vendosi rezultatin e pjesës së parë.

Në pjesën e dytë, vendasit e shtuan epërsinë me golin e Faton Nezirit në minutën e 55-të, i cili përfitoi nga një aksion i ndërtuar bukur në zonën kundërshtare.

Llapi arriti të rikthehet në lojë përkohësisht, kur Ardit Tahiri shënoi nga penalltia në minutën e 65-të, duke ngushtuar rezultatin në 2:1.

Megjithatë, në minutat e fundit të ndeshjes, Faton Neziri realizoi golin e tretë për Dukagjinin, duke përfituar nga një dalje e gabuar e portierit Çoriq dhe duke vulosur fitoren me rezultat 3:1.

Kjo fitore e forcon Dukagjinin në garën për mbijetesë, me 35 pikë në pozitën e shtatë, ndërsa Llapi tanimë rrezikon seriozisht rënien nga elita, duke mbetur në pozitën e parafundit me 30 pikë.