Sporte tjera

Sot në selinë e UEFAs në Nyon është tërhequr shorti për raundin preliminar të kualifikimeve evropiane për Kupën e Botës 2028 në futsall, ku Kombëtarja e Kosovës ka mësuar kundërshtarët e saj në fazën e parë të garave. Kosova është përfshirë në Grupin D, së bashku me Malin e Zi, Austrinë dhe Gjibraltarin.  Raundi preliminar do të zhvillohet nga 6 deri më 15 prill 2026, ku gjashtë grupet me nga katër ekipe do të garojnë në mini-turne. Dy ekipet e para të secilit grup sigurojnë kualifikimin në “Main Round”. Në këtë edicion të kualifikimeve marrin pjesë gjithsej 48 kombëtare, nga të cilat 24 me koeficient më të ulët e nisin garën nga raundi preliminar, ndërsa 24 të renditura më lart bashkohen në “Main Round”, ndeshjet e të cilës fazë më pas do të zhvillohen në tetor – dhjetor 2026 dhe shkurt – mars 2027.

Kampionia e Kosovës në futsall, Prishtina 01, ka realizuar një paraqitje shumë të mirë në ndeshjen e parë të 1/8 së finales në UEFA Futsal Champions League, duke barazuar 3:3 ndaj skuadrës kampione të Letonisë, Riga Futsal Club. Takimi u zhvillua në një atmosferë mjaft të mirë në Pallatin e Rinisë dhe Sportit në Prishtinë, ku përkrahja e tifozëve ishte gjithashtu një shtysë e rëndësishme për kampionët tanë drej rezultatit pozitiv. Prishtina 01 e nisi ndeshjen në mënyrë të shkëlqyeshme, duke kaluar në epërsi me golat e Drilon Maxharrajt në minutat 6’ dhe 10’. Por mysafirët arritën të barazojnë shifrat me golat e Viktors Kuļepovs (19’) dhe Daniel Airoso (32’). Prishtina 01 e riktheu epërsinë me golin e Ramadan Alaj në minutën 34-të, por letonët barazuan përmes Jose Marquardt (38’). Sidoqoftë, gjithçka mbetet e hapur dhe kampioni ynë ruan shanset për një kualifikim historik në çerekfinale të garës prestigjioze të futsallit evropian, ku ndeshja e kthimit zhvillohet më 5 dhjetor, në Riga të Letonisë. Nëse Prishtina 01 e kalon skuadrën letonase, në çerekfinale do të përballet me fituesin e çiftit Hit Kyiv (Ukrainë) – Palma Futsal (Spanjë), me këtë të fundit që është kampione në fuqi e Evropës.