Zyrtare: Roma nënshkruan me Aouarin

Roma ka njoftuar zyrtarisht nënshkrimin e mesfushorit Houssem Aouar në një transferim të lirë pas skadimit të kontratës së tij me skuadrën e Ligue 1, Olympique Lyonnais.

24-vjeçari ka rënë dakord për një marrëveshje pesëvjeçare, e cila do ta mbajë atë në “Stadio Olimpico” deri në verën e vitit 2028.

Aouar ka qenë në skuadrën e Lyonit që në moshën 11-vjeçare, duke iu bashkuar akademisë së skuadrës në vitin 2009, përpara se të avanconte në radhët e të rinjve, të luante për Lyon B dhe përfundimisht të bënte debutimin e tij të parë në raundin e 32-të të Europa League në 2016.

Që atëherë, Aouar ka grumbulluar 179 paraqitje në Ligue 1, duke shënuar 30 gola dhe 24 asistime, si dhe pesë gola të tjerë nga 34 ndeshje në Europa League dhe Champions League.

“Jam shumë i lumtur që kam nënshkruar për Romën, sepse ata janë një klub i madh me një histori të madhe”, tha Aouar pas nënshkrimit të kontratës.