Ramadani e pranon barazimin

Ndeshje me pak raste për shënim e ka vlerësuar trajneri i Gjilanit, Zekirija Ramadani, barazimin me Trepçën ’89 në “Riza Lushta” në Mitrovicë.

Trepça ’89 e Gjilani barazuan të dielën 0:0 në ndeshjen e xhiros së 31-të të elitës kosovare të futbollit.

“Në aspektin taktik, ekipi nuk ishte keq. Në pjesën e parë ngrita zërin për Yll Hoxhën dhe Armend Halilin, jo pse ata ishin keq në aspektin taktik, por nuk ishin të freskët disi. Iu mungoi shpirti luftarak. Por ata janë lojtarë me përvojë të madhe në futboll. Në 45 minutat e para të ndeshjes nuk reaguam mirë. Kjo ndeshje kishte pak raste. As nuk krijuam shumë e as nuk i lejuam kundërshtarit të krijojë shumë. Sidoqoftë, nuk dua t’ia mohoj kundërshtarit pikën e fituar. E uroj për pikën”, theksoi Ramadani.