Alaba: Austria synon “qiellin” në Botërorin 2026
Kapiteni i Austrisë, David Alaba, ka theksuar se përfaqësuesja e tij do të udhëtojë në Kupën e Botës 2026 me ambicie të larta, duke synuar të lërë gjurmë në një turne ku do të rikthehet pas shumë vitesh mungesë.
Në një prononcim për FIFA-n, mbrojtësi me përvojë botërore, i cili ka fituar trofe të shumtë me Bayern Munich dhe Real Madrid, ka pranuar se pjesëmarrja në Botëror është një nga momentet më të veçanta të karrierës së tij.
“Jam shumë i emocionuar. Është një ëndërr që bëhet realitet. Nuk ka shumë ngjarje më të mëdha se Kupa e Botës dhe ne jemi krenarë që jemi pjesë e saj”, ka deklaruar Alaba.
Austria siguroi kualifikimin pas një fushate të fortë dhe të qëndrueshme, ndërsa kapiteni kujtoi momentin e festës pas sigurimit të biletës për në turneun që do të zhvillohet në SHBA, Kanada dhe Meksikë.
“Ishte një natë plot emocione. E ndjeje në çdo lojtar se sa shumë do të thoshte ky sukses. Kemi punuar gjatë për këtë moment dhe e kemi merituar”, u shpreh ai.
Sipas Alabës, Kombëtarja austriake ka bërë hapa të mëdhenj përpara vitet e fundit, duke ndërtuar një grup të fortë dhe konkurrues nën drejtimin e trajnerit Ralf Rangnick.
“Kemi një skuadër me shumë cilësi dhe kemi fituar besim në vetvete. Duam ta tregojmë këtë në skenën më të madhe të futbollit botëror”, theksoi ai.
Austria ndodhet në një grup të vështirë me Argjentinën, Algjerinë dhe Jordaninë, por kapiteni beson se skuadra duhet të fokusohet te performanca e saj dhe jo te emrat e kundërshtarëve.
“Nuk ka rëndësi vetëm Argjentina apo emrat e mëdhenj. Ne duhet të luajmë lojën tonë dhe të qëndrojmë besnikë ndaj identitetit tonë”, tha Alaba.
Duke folur për ambiciet në turne, ai u tregua i kujdesshëm, por jo pa optimizëm, duke lënë të hapur mundësinë për surpriza.
“Nuk po mendojmë për titullin tani, por kemi një ekip që mund të bëjë gjëra të mëdha. Synimi ynë është të jemi konkurrues dhe të shkruajmë histori”, përfundoi kapiteni austriak.
Austria do të kërkojë që pjesëmarrjen e saj të parë në Botëror pas një periudhe të gjatë ta shndërrojë në një paraqitje dinjitoze dhe potencialisht historike.
