Man. City me kthesë spektakulare mposhtë Tottenhamin
1 min read![](https://futbolli.info/wp-content/uploads/2023/01/Fm3Y5T6XEA0-a2s-e1674164202599-jpg.webp)
Manchester City duket se nuk është ende gati ta “fshijë” veten nga gara për titull në Premier League, pasi me një rikthim të pabesueshëm në pjesën e dytë arriti të përmbysë deficitin 0:2 për triumfin 4:2 ndaj Tottenhamit, që e afron skuadrën e Guardiolës në pesë pikë me Arsenalin (që ka një ndeshje më pak).
Situata për skuadrën e Pep Guardiolës nuk dukej e mirë pas 45 minutave të para. Në minutën e 44-të, Dejan Kuluszewski shfrytëzoi një gabim në mbrojtje për të kaluar Tottenhamin në epërsi 1-0, derisa dy minuta më vonë pas përpjekjes së Harry Kane, Emerson Royal shënoi 0-2.
Megjithatë, City doli me energji të pabesueshme në pjesën e dytë për një kthesë të çmendur. Julián Alvarez ngushtoi rezultatin në 1:2 në minutën e 51-të, kurse vetëm tre minuta më vonë Erling Haaland shënoi golin e barazimit.
Lojtari vendimtar ishte Riyad Mahrez me golin e minutës së 63-të, ndërsa i njëjti lojtar në minutën e 89-të e vulosi fitoren e Cityt pas një aksioni të shpejtë dhe një reagimi të keq të mbrojtjes së skuadrës së Antonio Contes.
Kjo humbje, e dyta radhazi e tyre pas Arsenalit në derbin e madh, e lë Tottenhamin në vendin e pestë me 33 pikë, pesë pas Newcastle-it të vendit të katërt dhe me një lojë më pak.