Nottingham Forest dhe Braga hedhin hap drejt finales së Europa League
Nottingham Forest ka hedhur një hap të rëndësishëm drejt finales së UEFA Europa League, pasi ka shënuar fitore minimale 1:0 ndaj Aston Villa në ndeshjen e parë gjysmëfinale.
Skuadra nga Nottingham e siguroi avantazhin falë një penalltie të realizuar nga Chris Wood në minutën e 71-të, duke i dhënë ekipit të tij një epërsi të vlefshme për ndeshjen e kthimit në “Villa Park”.
Në gjysmëfinalen tjetër, SC Braga triumfoi në një përballje dramatike ndaj SC Freiburg, me rezultat 2:1.
Portugezët kaluan në epërsi që në minutën e 8-të me golin e Demir Ege Tıknaz, por reagimi i mysafirëve ishte i shpejtë, me Vincenzo Grifo që barazoi vetëm tetë minuta më pas.
Drama u thellua në fundin e pjesës së parë, kur Rodrigo Zalazar humbi një penallti për Bragan në kohën shtesë. Megjithatë, heroi i mbrëmjes u bë Mario Dorgeles, i cili realizoi golin e fitores në minutën e 92-të, duke i dhënë ekipit portugez një avantazh të lehtë për ndeshjen e kthimit.
Finalja e këtij edicioni të UEFA Europa League është planifikuar të zhvillohet më 20 maj në Vodafone Park në Istanbul, ku pritet një përballje e zjarrtë për trofeun kontinental.
