Bayern Munich mposht PSG-në në një derbi spektakolar të Champions League
Bayern Munich arriti një fitore të rëndësishme 2-1 në transfertë ndaj kampionit aktual të Evropës, PSG, në një ndeshje ku protagonisti kryesor ishte Luis Diaz. Kolumbiani shënoi dy herë për mysafirët, por më pas u përjashtua për një ndërhyrje të rrezikshme.
Ndeshja nisi me ritëm të lartë nga bavarezët, të cilët ushtruan presion të vazhdueshëm në gjysmën e fushës së PSG-së. Luis Diaz hapi rezultatin që në minutën e 4-t të ndeshjes, duke i dhënë një avantazh të hershëm ekipit gjerman. PSG reagoi me një gol të Ousmane Dembele, i cili u anulua për pozicion jashtë loje.
Bayern nuk ndali dhe në minutën e 32-t, Diaz shënoi golin e tij të dytë, pas një gabimi të kapitenit Marquinhos, duke çuar rezultatin në 2-0. Por euforia e mysafirëve u ndërpre kur Diaz u ndëshkua me karton të kuq pas një faulli ndaj Achraf Hakimi.
PSG-ja kishte edhe një pengesë tjetër në pjesën e parë, pasi Dembele u lëndua dhe u zëvendësua nga Lee Kang-in. Rezultati mbeti 0-2 deri në pushim.
Në pjesën e dytë, PSG përpiqej të ngushtonte diferencën dhe ia arriti në minutën e 74-t, kur Joao Neves shënoi për 1-2, duke i dhënë shpresë tifozëve në Parc des Princes. Megjithatë, përpjekjet e mëtejshme të Zaire-Emery dhe Neves për barazim u ndalën nga portieri i Bayern, Manuel Neuer, dhe saktësia e munguar e lojtarëve vendas.
Bayern mbajti avantazhin deri në fund dhe festoi një fitore të rëndësishme jashtë fushe. Ky sukses i sjell bavarezëve 12 pikë dhe kryesimin e përbashkët të Grupit, së bashku me Arsenalin, ndërsa për PSG-në ishte humbja e parë në këtë sezon të Ligës së Kampionëve.
