Ismet Munishi jep dorëheqje nga posti i trajnerit të Dukagjinit
Ismet Munishi nuk do të jetë më në krye të skuadrës së Dukagjinit. Trajneri prishtinas ka njoftuar të martën përmes një postimi në rrjetet sociale se ka dhënë dorëheqje nga ky post te klubi klinas, duke përmendur arsye personale.
“Rrugëtimi im te KF Dukagjini mbaron këtu. Për arsye personale jap dorëheqje nga posti i trajnerit. Falënderoj qytetarët e Klinës, presidentin Fabian Veseli, drejtorin Korab Desku, stafin e trajnerëve Ardian Basha, Ndue Pergjokaj, Valmir Bytyqi dhe Sejdi Morina, si dhe lojtarët për sakrificën dhe përkushtimin e tyre”, ka shkruar Munishi.
Munishi, 51-vjeçar, mori drejtimin e Dukagjinit vitin e kaluar dhe në këtë periudhë udhëhoqi skuadrën në 43 ndeshje zyrtare, duke regjistruar 17 fitore, 10 barazime dhe 15 humbje.
Nuk dihet ende se kush do ta pasojë Munishin në bankinën e Dukagjinit.
