“Thatësira” e pabesueshme saudite e Ronaldos: 0 trofe nga 13 tentativa
Cristiano Ronaldo, një nga futbollistët më të suksesshëm në histori me 35 trofe të fituar gjatë karrierës, po kalon një periudhë të pazakontë në Arabinë Saudite. Që prej momentit që iu bashkua Al Nassr-it, portugezi nuk ka arritur të fitojë asnjë trofe, pavarësisht 13 mundësive që ka pasur deri tani.
Mbrëmjen e djeshme, “thatësira” e Ronaldos u thellua edhe më shumë pas humbjes ndaj Al Ittihad në Kupën e Arabisë Saudite, ku Karim Benzema dhe Houssem Aouar ishin protagonistët kryesorë të takimit. Ndërkohë, CR7 nuk arriti të lërë gjurmë, përveç një goditjeje të humbur në pjesën e parë.
Në total, bilanci i Ronaldos me Al Nassr është 0 trofe nga 13 të mundshëm, të ndarë si më poshtë:
- 3 Liga Saudite
- 4 Kupa Kombëtare
- 2 Liga të Kampionëve të Azisë
- 4 Superkupa
Humbja më e fundit erdhi pas një serie penalltish dramatike, duke shtuar edhe një zhgënjim tjetër në listë.
Megjithatë, jo çdo gjë është negative për skuadrën e Jorge Jesus. Në kampionat, Al Nassr po kalon një moment fantastik, me 6 fitore në 6 ndeshje dhe kryeson renditjen me 18 pikë të plota.
Sulmi është pika më e fortë e skuadrës:
- João Félix kryeson listën e golashënuesve me 9 gola dhe 1 asistim,
- Cristiano Ronaldo ndodhet në vendin e tretë me 6 gola dhe 1 asistim,
- ndërsa Kingsley Coman ka kontribuar me 3 gola dhe 4 asistime.
Forma e mirë në kampionat jep shpresë se Al Nassr mund ta thyejë mallkimin e trofeve, por eliminimi i hershëm nga Kupa mund të ndikojë negativisht në moralin e skuadrës dhe të vetë Ronaldos.
