Leao shpëton Milanin, “Rossonerët” marrin kreun e Serie A
AC Milan arriti të regjistrojë fitoren e pestë në Serie A, duke mposhtur Fiorentinën 2:1 në “San Siro”, në ndeshjen e javës së shtatë të kampionatit italian. Fitorja sjell Milanin në vendin e parë të tabelës.
Ndeshja filloi me një ritëm të matur, ku të dyja ekipet preferuan të mos rrezikonin shumë. Fiorentina tregoi një mbrojtje të fortë, ndërsa Milan kishte më shumë zotërim topi. Rastin e vetëm të rrezikshëm në pjesën e parë e pati Strahinja Pavlović, i cili e gjuajti mbi portë nga afërsia.
Në minutën e 55-të, Fiorentina arriti të kalojë në avantazh. Pas një goditjeje këndi, topi përfundoi te Robin Gosens, i cili e shtyu në rrjetë pas një pasimi nga Gabbia – 0-1.
Milan reagoi shpejt. Rafael Leao u aktivizua në qendër dhe realizoi golin e barazimit në minutën e 63-të, duke nisur një aksion individual nga më shumë se 30 metra larg dhe duke gjuajtur me saktësi në cepin e poshtëm të portës – 1-1.
Atmosfera në “San Siro” ndihmoi kuqezinjtë të ushtrojnë presion dhe të krijojnë raste të tjera, përfshirë përmes Fofanës dhe Jimenez, por vizitorët u mbrojtën fort. Në minutën e 76-të, një duel i De Geas me Parisin solli penalltinë, e cila u konfirmua pas shqyrtimit VAR. Leao u tregua vendimtar edhe një herë, duke shënuar golin e fitores për Milanin – 2-1.
Me këtë fitore, Milan ngjitet në krye të tabelës me 16 pikë, një më shumë se Interi, Napoli dhe Roma, të cilët kanë nga 15 pikë secili. Për Fiorentinën, nisja e këtij sezoni konsiderohet nga më e dobëta në histori.
