Rashica asiston në fitoren e Galatasarayt
Milot Rashica ka asistuar në njërin prej dy golave të Galatasarayt, që të mërkurën mbrëma fitoi ndaj Ankaragucut, 2:1.
Kjo ndeshje i takoi xhiros së 17-të të Superligës së Turqisë.
Galatasaray ishte në disavantazh prej një goli nga minuta e shtatë, por Rashica asistoi në minutën e 16-të për Baris Alper Yilmazin, që barazoi shifrat në 1:1.
Bafetimbi Gomis pas gjysmë ore lojë shënoi për 2:1 dhe me këtë rezultat edhe u mbyll ndeshja.
26-vjeçari Rashica që luajti deri në minutën e 83-të, ka tri asistime të realizuara në elitën e futbollit të Turqisë në këtë edicion, në 10-të paraqitje.
