Dukagjini arkëton tri pikë të rëndësishme në Gjilan

Dukagjini ka arritur një fitore të rëndësishme në udhëtim kundër Gjilanit, duke marrë tre pikët pas triumfit 1:2 në një ndeshje tejet dinamike.

Në minutën e pestë të takimit, Mërgim Pefqeli e zhbllokoi rezultatin për Dukagjinin pas një asistimi të bukur nga Erlis Xhemajli, duke i dhënë avantazhin e hershëm skuadrës së Ismet Munishit. Loja e mirë e mysafirëve vazhdoi dhe u shpërblye me një gol tjetër nga talenti Hekuran Berisha, i cili dyfishoi epërsinë në minutën e 41-të.

Në pjesën e dytë, Gjilani intensifikoi sulmet dhe u përpoq të rikthehej në lojë. Megjithatë, gjithçka që arriti ishte një gol nga pika e bardhë në minutën e 83-të, të cilin e realizoi Senad Jarovic.

Pas kësaj fitoreje, Dukagjini ngjitet në vendin e tetë të renditjes me 14 pikë, ndërsa Gjilani, me 13 pikë, zbret në pozitën e parafundit.