Southgate: Duhet të ndalojmë Xhakën dhe Frøylerin, ata po e “mbajnë” Zvicrën

Trajneri i Anglisë, Gareth Southgate, ka folur për disa tema në prag të ndeshjes çerekfinale kundër Zvicrës, por më specifike ishte kur përmendi armët më të forta të kundërshtarit.

Anglia do të ketë një sfidë të vështirë për një vend në top katërshe në Kampionatin Evropian dhe Southgate beson se djelmoshat që drejton duhet t’i kushtojnë vëmendje disa lojtarëve nga kampi tjetër.

“Zvicra ka një ekip shumë kompakt. Ata nuk kanë shumë yje, por mbështeten te dy lojtarë shumë të rëndësishëm, Xhaka dhe Frøyler. Të dy janë luftëtarë të mëdhenj, mesfushorë shumë të mirë dhe të kompletuar, me karakteristika sulmuese dhe mbrojtëse. Ata e mbajnë topin mirë, kombinohen dhe kanë lidership në qëndrim.  Në të njëjtën kohë, ata mund të shënojnë gola, por edhe të presin një top të rrezikshëm në mbrojtje. Ata janë një pjesë integrale e përzgjedhjes së tyre dhe lojtarët e mi do të duhet të përballen mirë me ta. Çdo gabim dënohet menjëherë rëndë”, tha Southgate.

Ai tutje ka thënë se ekipi i tij është shumë më i fortë në aspektin mental pas ndeshjes me Sllovakinë.

“Kemi një atmosferë të mrekullueshme, të cilën shpresoj ta transmetojmë në ndeshje. Do të bëjmë gjithçka për të fituar, sepse qëllimi është i qartë. Nëse arrijmë në gjysmëfinale, do të jetë fantastike për ne dhe për të gjithë tifozët tanë”, shtoi Southgate.

Zvicra ka treguar futboll të shkëlqyer në ndeshjet e saj të deritashme në Kampionatin Evropian, duke eliminuar edhe Italinë. Edhe pse Anglia konsiderohet si favorit në këtë ndeshje, këtu pritet një betejë e madhe për kualifikim mes katër më të mirëve.