Danezët marrin një pikë ndaj “Tre Luanëve”

Kombëtaret e Danimarkës dhe Anglisë zhvilluan një ndeshje emocionuese dhe interesante në xhiron e dytë të Grupit C të Kampionatit Evropian dhe barazuan me rezultatin përfundimtar 1-1 (1-1). Djelmoshat e Gareth Southgate treguan një paraqitje mjaft inferiore në pjesën e dytë dhe mund të jenë të lumtur që nuk humbën në fund.

Pjesa e parë solli futboll të hapur dhe dinamik në të dyja anët e fushës. Anglezët vepruan disi më kompakt dhe arritën të realizojnë një rast me kapitenin Harry Kane , i cili përfitoi nga gabimi i mbrojtjes dhe kaloi në avantazh 1-0 në minutën e 18-të.

Danezët nuk u treguan aspak naivë dhe krijuan dy raste të mira, e një prej tyre e shfrytëzoi Morten Hjulmand, i cili solli golin e barazimit dhe gëzimin e madh për tifozët e tij në minutën e 34-t të ndeshjes.

Fillimi i pjesës së dytë ofroi një rast të mirë për Danimarkën, por pa realizim konkret nga Eriksen. Anglia u duk pak e çorganizuar dhe gaboi në mesin e fushës, por rivali nuk arriti ta ndëshkonte një qasje të tillë në minutën e 70-të.

Me afrimin e minutave të fundit, loja ngadalë u qetësua, megjithëse Danimarka u përpoq të ushtronte presionin e fundit dhe ndoshta të merrte pikët e plota. Disa herë “Tre Luanët” dukeshin se nuk u interesuan për portën e kundërshtarit, ndërsa danezët patën edhe 2-3 raste më solide, por nuk arritën ta befasojnë favoritin.

Barazimi 1-1 duket se në fund ishte rezultati më real, megjithëse Danimarka mund të kishte pretenduar një triumf të rëndësishëm dhe të merrte gjahun e plotë. Anglia kryeson grupin me katër pikë, ndërsa danezët tani kanë dy pikë, aq sa ka edhe Sllovenia, derisa Serbia është e fundit me 1 pikë.