Mbappe: Kupa e Botës, gara e ëndrrave të mia

Kampionia e botës, Franca aktualisht po mbron me sukses titullin e fituar në Botërorin e kaluar. “Gjelat” u kualifikuan në çerekfinale, ku do të përballen me Anglinë, pasi kaluan me lehtësi Poloninë, me rezultat 3:1, në 1/8 e finales. Heroi i Francës ishte Kylian Mbappe, i cili shënoi dy gola dhe shënoi një asist për Olivier Giroud.

“Jemi të lumtur që arritëm në çerekfinale, kjo nuk ishte një lojë aspak e lehtë. Ne arritëm të shënonim gola në momente kyçe dhe kjo është arsyeja pse u duk kaq e lehtë”, tha Mbappe.

Ai thekson se është i fokusuar vetëm te trofeu dhe nuk i intereson titulli i golashënuesit më të mirë në Botëror. Mbappe ka shënuar pesë gola deri më tani në Katar.

“Kupa e Botës është gara e ëndrrave të mia. Por, ne jemi ende larg objektivit që i kemi vënë vetes. Do të bëjmë gjithçka për të mbrojtur titullin. Nuk mendoj nëse do të jem golashënuesi më i mirë. Qëllimi im i vetëm është të fitoj Kupën e Botës. Kjo është ëndrra ime e vetme – erdha këtu për të fituar Kupën e Botës, jo titullin e golashënuesit më të mirë”, shtoi Mbappe.