“Shumë i mirë për Man Utd”, Bruno Fernandesit i kërkohet të bashkohet me Man Cityn

Ish-mesfushori i Tottenham Hotspur, Jamie O’Hara ka ndezur polemika duke sugjeruar se kapiteni i Manchester Unitedit, Bruno Fernandes , është “shumë i mirë” për klubin nga Old Trafford dhe duhet të largohet në kërkim të trofeve.

Në një intervistë me Grosvenor Sport, O’Hara shprehu shqetësimet e tij për të ardhmen e Fernandes në Old Trafford, duke përmendur formën e dobët të ekipit dhe talentin e jashtëzakonshëm të mesfushorit.

“Bruno Fernandes duhet të largohet nga Manchester United. Ai nuk do të fitojë trofe të Ligës Premier me klubin. Ai duhet të largohet dhe të shkojë në një klub të lartë që do të fitojë trofe; ai është shumë i mirë për skuadrën në të cilën po luan”, ka thënë fillimisht O’Hara.

Komentet e O’Haras vijnë pas njoftimit të Kevin De Bruyne se ai do të largohet nga Manchester City në fund të sezonit.

Mesfushori belg ka qenë një lojtar kyç për Cityn dhe largimi i tij ka ndezur një debat se kush do ta zërë vendin e tij si mesfushori më i mirë në Etihad.

Ndërsa Fernandes ka qenë i rëndësishëm në suksesin e Manchester United, O’Hara beson se ai e meriton të luajë për një klub të lartë që mund të konkurrojë për trofe të mëdhenj.

“Nëse e vendosni Brunon në skuadrën e Man City, ata do të shkonin dhe do të fitonin ligën”, përfundoi anglezi.